المعيشة في الإمارات

بالمجمل المصروف لشخص بدبي خلال شهر وسطياً حوالي 1500 درهم
وبالشارقة حوالي 1200 درهم.

الأجارات :
بدبي بتبدأ من 600 لغرفة مشتركة فيها 4-6 أشخاص..
ممكن تحصل بارتشن ب650 بالاشتراك مع شخص تاني.
الشارقة بتبدأ الاجارات من 350 لغرفة فيها 6-7 أشخاص.

المواصلات بالشارقة باصات وبتبدأ من 8 درهم لمسافة 26 كم والدفع بدون بطاقة.
بدبي حاول تعتمد بتنقلاتك عالمترو بتشتري بطاقة اسمها (بطاقة نول) من اي محطة مترو وبتشحنها وبتصير بتستخدمها لتنقلاتك ضمن دبي سواء مترو او باص ،خط المترو كامل ب7.5 درهم من أول دبي لأخرها وبكل محطة فيك تنقل لمحطة باص او ترام.
بكل محطة حتلاقي لوحات توضيحية تشرحلك المحطات يلي فيك تطلع عليها.

استخدموا التطبيقات يلي حكينالكن عنهن قبل متل دوبيزل ومرجان لتلاقوا بيوت للاجار بأسعار حلوة.

فرص العمل :
ضروري جداً وجود شهادة واتقان اللغة الانكليزية لتحص خيارات أفضل.
قبل ماتطلع ابعت سيفي لكل الشركات يلي بتهمك وراسل كل الخيارات يلي بتتناسب معك.
دور على اي شغل اول ماتوصل مو ضروري بس باختصاصك وزبط إقامة أهم شي.

أكتر فرص العمل المطلوبة:
إدارة الأعمال ، البرمجة والتكنولوجيا ، التصميم والتسويق،الهندسة ، الموارد البشرية ،مندوبين المبيعات والريسبشن.
موضوع الفريلانسر كتير مهم تشتغل عليه لانك كتير رح تستفيد منو ، راسلوا شركات بعتولهن نماذج عن شغلكن ، وسبق وحكينالكن عن منصات للفريلانسر اشتغلو عليهن ،ونزلوا التطبيقات يلي حكينا عنهن كمان من قبل.

الرواتب :
بتبدأ للسوريين من 2500 درهم وبتوصل ل6000-7000 حسب الشركة والخبرة والمهنة.

التسوق :
اعتمد أول فترة على كارفور وتعاونية الاتحاد ودي تو دي ، بتلاقيلهن فروع بكل مكان واسعارهن جداً مناسبة بينما انت تلاقي الارخص والاقرب لمكان سكنك ، وبكارفور بتلاقي كتير عروض على منتجات واغذية فيك تستفيد منها بشكل كبير.